சுற்றுலா பயணிகள் பாதுகாப்பு குறித்து தேமுதிக கேள்வி !?
உலகப் புகழ்பெற்ற சுற்றுலா தளமான கன்னியாகுமரியில் பயணிகள் பாதுகாப்பு குறித்து தேமுதிக சமூக வலைதள மாநில துணை செயலாளர். வழக்கறிஞர் சிவகுமார் நாகப்பன் மாவட்ட காவல் கண்காணிப்பாளர் ஸ்டாலின் அவர்களுக்கு கோரிக்கை இது குறித்து அவர் அனுப்பிய மனுவில்
புகழ் பெற்ற கன்னியாகுமரி முக்கடல் சங்கமத்தில் (பதினாறுகால் மண்டபம் சங்கிலி துறை மற்றும் அருகில் உள்ள கடற்கரை) சுற்றுலா பயணிகளும், ஐயப்ப பக்தர்களும் பல நூறு ஆண்டுகளாக புனித நீராடி வருகிறார்கள். ஆனால் கடந்த சில நாட்களாக கன்னியாகுமரி காவல் துறை சுற்றலா பயணிகளுக்கும், ஐயப்ப பக்தர்களுக்கும் நன்மை செய்வதாக நினைத்துக்கொண்டு சங்கிலி துறை அருகில் புனித நீராடும் பகுதிக்கு சுற்றலா பயணிகளும், ஐயப்ப பக்தர்களும் செல்ல முடியாத அளவிற்கு பாதையை அடைத்து வைத்து மக்களின் உயிருடன் விளையாடி வருகிறார்கள்.
பதினாறுகால் மண்டபம் சங்கிலி துறை மிகவும் குறுகலான படிக்கட்டுக்கள் கொண்ட பகுதி என்பதாலும், அதிகாலை நேரம் அதிக அளவிலான சுற்றலா பயணிகளும், ஐயப்ப பக்தர்களும் முக்கடல் சங்கமத்தில் புனித நீராடி தங்கள் வேண்டுதல்களையும், கடமைகளையும் நிறைவேற்றுவார்கள். அதனால் குறுகலான சங்கிலி துறை படிக்கட்டுக்கள் வழியாக சங்கிலி துறையில் அனைவரும் ஒரே நேரம் புனித நீராட இயலாது.
இதனால் சங்கிலி துறையில் நெரிசல் ஏற்பட்டால் உயிர் சேதம் ஏற்பட வாய்ப்புள்ளது.
கன்னியாகுமரி மாவட்ட காவல்துறைக்கு சுற்றலா பயணிகள் மற்றும் ஐயப்ப பக்தர்கள் மீது அக்கறை இருக்குமேயானால் கன்னியாகுமரி நகராட்சி நிர்வாகம் மூலம் கன்னியாகுமரி முக்கடல் சங்கமத்தில் தடுப்பு வேலிகள் அமைக்கவும், அதிகளவில் மிதவைகள் அமைக்கவும் ஏற்பாடு செய்ய வேண்டும்.
மேலும் வரலாற்றில் முதல் முறையாக கன்னியாகுமரி மாவட்ட காவல் துறை முக்கடல் சங்கமத்தில் சுற்றலா பயணிகள் மற்றும் ஐயப்ப பக்தர்கள் புனித நீராட முடியாதவாறு தடைகள் ஏற்படுத்தி வைத்துள்ளதன் மூலம் மக்களை பாதுகாக்கும் பணியில் கன்னியாகுமரி காவல் துறை தோல்வி அடைந்துள்ளதை காட்டுகிறது.
கன்னியாகுமரி முக்கடலில் புனித நீராடுவது என்பது இந்திய அரசியலமைப்புச் சட்டம், பிரிவு 25 இந்தியர்களுக்கு வழங்கியுள்ள (மத வழிபாடு) அடிப்படை உரிமை. அந்த உரிமைகளை தடுப்பதற்கும், பறிப்பதற்கும் கன்னியாகுமரி காவல் துறைக்கு அதிகாரம் இல்லை.
எனவே கன்னியாகுமரி மாவட்ட காவல் கண்காணிப்பாளர் ஸ்டாலின், இ. க. ப அவர்கள் இதை நன்கு ஆராய்ந்து தொலைதூரத்தில் இருந்து வந்து புனித நீராடும் பக்தர்களை பாதுகாக்க திட்டங்களை வகுத்து செயல்படுத்தி, உடனடியாக முக்கடல் சங்கமத்தில் பக்தர்கள் புனித நீராட தடை ஏற்படுத்தி வைக்கப்பட்டுள்ள தடுப்புக்களை அப்புறப்படுத்த தகுந்த உத்தரவுகள் பிறப்பிக்குமாறு தேசிய முற்போக்கு திராவிட கழக சமூக வலைதள அணி சார்பில் கேட்டுக்கொள்கிறேன். என குறிப்பிட்டுள்ளார்
